CHJAMA A I CORSI PER A CUNSULTA NAZIUNALE - Août 2002

 

Chjama a i Corsi

per a Cunsulta Naziunale

 

 

 

U populu corsu hà sempri accirtatu a vulintà d'essa patronu di a so sorti.

 

Sempri hà fattu fronti à i forzi d'invasioni chi' si sò succiduti da cunquistà u so tarritoriu naziunali, sin'à dassi cù Pasquale Paoli un' indipindenza esemplari impastata à seculi di Storia, di risistenzi è di lotti da a libartà.

 

Più di dui seculi fà, u Statu francesu ci hà toltu u nostru locu cù a viuIenza è a forza armata. L'hà fatta finita cù u Statu corsu. Parò, u nostru populu mai s'hè integratu à 1'insemu francesu. Numarosi rivolti contr'à a duminazioni culuniali ani incausatu a riprissioni è afflittu u nostru locu.

 

A rinascita di u muvimentu naziunali à a fini di l'anni sissanta hà marcatu u fiascu di a pulitica d'assimilazioni, di nigazioni è di distruzzioni di u fattu naziunali corsu.

 

Da tandu, u muvimentu naziunali opponi una risistenza assuluta à a vulintà di strughja a nostra identità par via di una pulitica dicisa d'acculturazioni, d'esiliu furzatu è di culunisazioni di pupulamentu.

 

Dopu à u fiascu di tanti riformi istituziunali chi mai ani postu a quistioni corsa in a so diminsioni naziunali, l'urganisazioni patriottichi sò risuluti à cuntribui insemu à una suluzioni isciuta da u populu stessu.

 

Di fatti, tocca à u nostru populu è solu ad eddu, forti di u so drittu imprescrittibuli à l'autoditarminazioni, ad assuma a so sorti. Par ciò, hè lecita chè no mittissimi in opara istituzioni pulitichi sputichi è difiniscissinu a forma custituzionali di un' amministrazioni naziunali.

 

Da assicurà dimucrazia è pluralisimu, sti strutturi abbisognani:

 

§   A custituzioni di un Corpu eletturale corsu.

§    L'elezzione di una Cunsulta Naziunale di a Corsica (Assemblea Naziunale Pruvisoria).

 

U fini di a Cunsulta Naziunali di a Corsica sarà:

§ accirtà a suveranezza di a nazioni corsa ;

§ elaburà un prughjettu custituziunali ;

§ dà à a lotta di u populu corsu un ribombu internaziunali ;

§ raghjunà è pona i basi di un prughjettu ecunomicu, suciali è culturali ;

§ opponasi, cù a forza di u populu, à qualunqua rializazioni numica di I'intaressi naziunali di u populu corsu.

 

http://afiordicarta.net